День: 07.01.2021

Дар маҷлисгоҳи макомоти иҷроияи ҳокимияти давлатии шаҳри Хоруғ бо иштироки раиси Вилояти Мухтори Кӯҳистони Бадахшон Ёдгор Файзов маросими қадрдонии ғолибон ва иштирокчиёни озмуни ҷумҳуриявии «Фурӯғи субҳи доноӣ китоб аст» баргузор гардид.
Сардори Раёсати маорифи вилоят Одинашо Мардов чорабиниро ифтитоҳ намуда, гуфт, ки аз миёни иштирокдорони даври вилоятии озмун ба даври ҷумҳуриявӣ 9 нафар роҳхат гирифтанд, ки аксарияташон хонандагони муассисаҳои таҳсилоти умумии шаҳр ва ноҳияҳои вилоят ҳастанд.
Хушбахтона, дар даври ҷумҳуриявии озмун хонандаи синфи 6 муассисаи таҳсилоти миёнаи умумии рақами 11 –и ноҳияи Шуғнон Мабатқадамова Шаҳина аз рӯйи номинатсияи адабиёти бачагона соҳиби ҷойи якум ва хонандаи синфи 11 –и Литсейи Оғохони шаҳри Хоруғ Одинамамадова Шарифамоҳ аз рӯйи номинатсияи азбар кардану хондани осори адабиёти ҷаҳон сазовори ҷойи 3-юм гардида, иштирокдорони дигар бо ифтихорномаи Вазорати маориф ва илми Ҷумҳурии Тоҷикистон ва мукофоти пулӣ қадр карда шуданд.
Ёдгор Файзов, раиси вилоят аз номи Мақомоти иҷроияи ҳокимияти давлатии вилоят ба иштирокдорони озмун, муаллимон ва волидони онҳо изҳори миннатдорӣ карда, ширкати фаъоли хонандагони муассисаҳои таҳсилоти миёнаи умумии вилоятро дар он шоистаи таҳсин хонд.
-Озмуни мазкур, ки таҳти сарпарастии бевоситаи Пешвои миллат муҳтарам Эмомалӣ Раҳмон роҳандозӣ гардид, бори дигар исбот менамояд, ки мардуми тоҷик таърихан миллати фарҳангдӯст, соҳибкитоб ва тамаддунофар буда, пайравӣ кардан ба гузаштаи пурифтихор ва рӯ овардан ба китобхонӣ дар замони муосир зарур ва ҳатмист. Маҳз тавассути мутолиаи китоб инсон ба худ ҷаҳонро кашф мекунад, муҳити маънавиашро ғанӣ мегардонад. Хондани китоб дар ҷавонӣ “ин нақш дар санг ва дар пирӣ каф дар об”. Аз ин рӯ, барои китобхонии фарзандонамон шароит муҳайё созем, то дар оянда мавқеи худро дар ҷомеа ёфта тавонанд,-афзуд раиси вилоят.
Бо изҳори нигаронӣ аз ширкати сусти дигар табақаҳои ҷомеа, аз ҷумла донишҷӯёну омӯзгорон, ҷавонон ва калонсолон дар озмун, раиси вилоят гуфт, ки минбаъд бояд ба он доираи васеи омма ҷалб карда шаванд.
Дар навбати худ иштирокдорони озмун, волидон ва омӯзгорони онҳо баромад намуда, миннатдории худро ба Ҳукумати кишвар ва мақомоти иҷроияи ҳокимияти давлатии вилоят баён намуданд.
Сипас, дар фазои тантанавӣ ғолибони озмун ва дигар иштирокчиён бо Ифтихорнома ва мукофоти пулии раиси вилоят қадр гардиданд. Ҳамчунин волидон, омӯзгорон ва онҳое, ки дар баргузории озмун саҳм гузоштанд, бо ифтихорнома ва сипосномаи Раиси вилоят, иҷрокунандаи раиси шаҳри Хоруғ ва Раёсати маорифи вилоят сарфароз шуданд. 

Ба хотири муаррифии беҳтарин устои асбобҳои мусиқии халқӣ ва беҳтарин бофандаи соли 2020 дар Маркази сайёҳӣ, ҳунарҳои мардумӣ ва соҳибкории шаҳри Хоруғ ҷамъомади тантанавӣ баргузор гардид.Раиси Ташкилоти ҷамъиятии «Де Памири» Ёралӣ Бердов зимни натиҷагирӣ аз озмун қайд кард, ки ташкилоташон аз соли 2004 инҷониб дар самтҳои рушди ҳунарҳои мардумӣ, дастгирии аҳли санъату фарҳанг ва рушди истеъдодҳои наврас фаъолият намуда, барои муайян кардани чеҳраҳои нави ҳунар ҳамасола озмунро баргузор менамояд.Бо паҳншавии касалии Коронавирус ва мушкилии авзоъ нигоҳ накарда, Маркази эҳёи ҳунарҳои мардумӣ фаъолият мекард. Маҳсули дасти ҳунармандони ин марказ дар шаҳри Душанбе дар шаҳрҳои Федератсияи Русия-Томск, Санкт-Петербург ҷва Москва ба намоиш гузошта шуда, аз тарафи ҳакамон баҳои баланд гирифтанд. Имрӯз ҳам аз байни 10 нафар устоҳои беҳтарини асбобҳои мусиқӣ ва 10 бофандаи беҳтарини ноҳияҳои вилоят онҳое ба ҷамъомад даъват карда шуданд, ки ғолиби озмун гардиданд.Муовини раиси вилоят Умедҷон Носирзода, аз номи мақомоти иҷроияи ҳокимияти давлатии вилоят баромад карда, қайд кард, ки соли 2020 бинобар касалии Коронавирус соли мушкилтарин буд, вале новобаста ба ин раиси вилоят муҳтарам Ёдгор Файзов ҳунармандонро аз ҳар ҷиҳат дастгирӣ намуда, барои зинда ва эҳё намудани ҳунарҳои халқии Бадахшон онҳоро қадрдонӣ менамуд. Бадахшон минтақаи асосии рушди соҳаи сайёҳӣ мебошад. Сайёҳоне, ки ба Тоҷикистон мебиёянд, аввал аз Бадахшон дидан мекунанд, аз чашмаҳои мусаффо ва шифобахш, аз кӯҳҳои сарбафалак, аз табиати нотакрори он. Аз ин ҷост, ки кӯҳҳои Бадахшон ба феҳрасти 100 минтақаи мувофиқ барои туризми экологӣ дохил гардиданд.Барои дарёфти истеъдодҳои нави ҳунар чунин озмунҳо минбаъд ҳам, ташкил карда шаванд, иброз дошт, – муовини раиси вилоят ва ғолибони озмунро табрик намуд.Дар фарҷом аз тарафи муовини раиси вилоят Умедҷон Носирзода ба 4 нафар бофандаи беҳтарини вилоят Гулзор Маҷнунова, Гулбону Кабирова, Соҳибгул Муминшоева, Суханоро Алибахшова ва 3 нафар устои беҳтарини асбобҳои мусиқии халқии Бадахшон Озод Ошурмамадов, Суҳайлӣ Дилшодов ва Саидҳасан Саидҳасанов ифтихорнома ва мукофотпулӣ супорида шуданд