Машварати назоратии назди раиси Вилоят Мухтори Кухистони Бадахшон бо иштироки муовини аввали раиси вилоят, муовинони раиси вилоят, раиси шаҳри Хоруғ, роҳбарони мақомоти ҳифзи ҳуқуқ дар вилоят, идораву муассисаҳои вилоятӣ, намояндагони ВАО доир гардид, ки масъалаҳо дар бораи “Рафти иҷрои қарори раиси вилоят аз 15 апрели соли 2019 оид ба иҷрои Қарори Ҳукумати Ҷумҳурии Тоҷикистон аз 29 марти соли 2019 “Дар бораи сари вақт омода намудани соҳаҳои иқтисодиёт, иҷтимоиёти ҷумҳурӣ барои фаъолияти мунтазам ва самарабахш дар мавсими зимистони солҳои 2019-2020”, “Ҷараёни иҷрои Фармони Президенти Ҷумҳурии Тоҷикистон аз 12 октябри соли 2015 “ар бораи тайёрӣ ва гузаронидани барўйхатгирии аҳолӣ ва фонди манзили Ҷумҳурии Тоҷикистон дар соли 2020” ва “ Ахборот дар бораи риояи Қонуни Ҷумҳурии Тоҷикистон “Дар бораи муроҷиатҳои шахсони воќеӣ ва ҳуқуқӣ”-ро мавриди баррасӣ қарор дод.
Латиф Шоҳзодаев, сардори Раёсати иқтисод ва савдои вилоят доир ба масъалаи якуми машварат ахборот дода, зикр намуд, ки дар масъалаи омодагӣ ба зимистонгузаронӣ дар вилоят корҳои муайян иҷро шуда, натиљаҳои муайян ба даст омаданд. Дар доираи маблағҳои пешбинигардидаи буҷети маҳаллӣ барои иҷрои корҳои таъмирӣ, харидани сўзишворию равғанҳои молиданӣ, аз ҷумла ангишт ва ҳезум дар соли 2019 маблағи 9441114 сомонӣ ҷудо гардид, ки 9232142 сомонӣ ё худ 97,8 фоизи он ба ин мақсад сарф шудааст.
Зимни муҳокимаи масъала Ёдгор Файзов, раиси вилоят зикр кард, ки зимистони соли гузашта моро ҳушдор дод, ки он дар шароити Бадахшон ба чӣ қодир аст. Имсол зимистони вилоят нисбатан хеле камбориш омад, аз ин набояд хотирҷамъ шуд. Зеро аслан зимистони Бадахшон дар пеш аст. Боришоте, ки пешгӯӣ мешавад ва дар манотиқи болоии вилоят ҳукми анъана дорад, роҳбарони идораву муассисаҳоро водор месозад, ки ба он ҳамаљониба омода бошанд. Бахусус муассисаҳои нигаҳдории роҳҳо бояд аз мушкилоти зимистони гузашта хулосаи даркорӣ бароранд.
Раиси вилоят ҳамчунин таъминоти муассисаву идораҳо ва аҳолиро бо ангиштсанг ҷињати гаронии нархи он дар вилоят аз мушкилоти мавсими зимистонгузаронӣ арзёбӣ намуд. Тавре таъкид шуд, нархи як тонна ангишт дар худи конҳои ҷумҳурӣ вобаста ба сифат аз 265 то 295 сомониро ташкил медиҳад. Вале нархи он мувофиқи ҳуҷҷатҳои тендерӣ то ноҳияи Ишкошим ба 1400 сомонӣ мерасад. Яъне роҳкирои овардани як тонна ангишт нисбат ба нархи худи он 3-4 баробар қиматтар меафтад. Раиси вилоят аз он изҳори нигаронӣ кард, ки сифати ангишт на дар ҳамаи муассисаҳо мувофиқи матлаб аст. Мушоҳида мешавад, ки дар як муассиса сифати ангишт бад бошад ҳам, нархи он баланд, дар мавриди дигар сифати ангишт хубтар, вале нархи он пасттар аст. Ҳодисаҳои дахолати раисони ноҳияҳо ба масъалаи дастраскунии ангишт ба муассисањо низ љой доранд. Нисбати баргузор намудани тендери харид эрод гирифта шуд. Таъкид гардид, ки минбаъд бе гузаштани тендер ангишт ба муассисаҳо дастрас карда нашавад. Раиси вилоят дастур дод, ки айни замон масъалаи таъминот бо ангишт дар ҳамаи муассисаҳои маориф ва тандурустӣ бори дигар санҷида шуда, муассисаҳое, ки аз талаботи воқеиашон камтар сўзишворӣ гирифтаанд, аз ҳисоби маблағҳои аз дигар сарчашмаҳо дастрасшуда бо маводи сўхт пурра таъмин карда шаванд. Мушкилоти вилоят дар таъмини муассисаҳои соҳаи иҷтимоӣ ва аҳолии вилоят дар самти таъминот бо ангиштро ба инобат гирифта, Пешвои миллат муҳтарам Эмомалӣ Раҳмон дар маҷлиси Ҳукумати Ҷумҳурии Тоҷикистон ба ширкати “ТАЛКО” дастур доданд, ки ҷиҳати коҳиш додани нархи ангишт дар вилоят ва сифати он соли равон кони Равноби ноҳияи Дарвоз ба истифода дода, тобистони ҳамин сол вилоятро пурра бо ангишт таъмин намояд. Ҳамзамон раиси вилоят супориш дод, ки сохторҳои дахлдор соли равон маблағҳои барои зимистонгузаронӣ равонашудаи буҷаро таҳти назорати қатъӣ гирифта, ба он бояд ноил гардид, ки дар заминаи паст кардани нархи ангишт ҷиҳати дастрас кардани он аз кони ангишти Равноб таъминоти он дар муассисаҳо 30-40 фоиз зиёдтар карда шавад.
Раиси вилоят аз он изҳори ташвиш кард, ки дар асари хуруҷи касалии ба ном “коронавирус” дар Ҷумҳурии Мардумии Чин шоҳроҳи Душанбе- Хоруғ- Кулма баста шуд. Ин ба баланд шудани нарху наво боис мегардад. Вале онро кушода мондан ҳам аз ин хавфноктар аст. Зеро касалӣ метавонад, тариқи гузаргоҳи Кулма ба Тоҷикистон гузар кунад. Раиси вилоят бо такя ба иттилои мақомотҳои дахлдор иттилоъ дод, ки Ҳукумати Ҷумҳурии Тоҷикистон ҷиҳати пешгирии интиқоли “коронавирус” ба кишварамон тамоми чорабинињоро роҳандозӣ намудааст. Дар худи гузаргоҳи Кулма ва ноҳияи Мурғоб барои безараркунонии шахсоне, ки аз давлати Хитой ба Тоҷикистон ворид мешаванд, тадбирҳои зарурӣ андешида шуда, айни ҳол 27 нафар дар ин ҷо дар карантин қарор доранд. Иззори боварӣ карда шуд, ки имконияти вуруди ин касалӣ ба Тоҷикистон хеле маҳдуд аст. Дар баробари ин ба мақомотҳои дахлдор дастур дода шуд, ки доир ба ин масъала байни мардум корҳои фаҳмондадиҳиро ба роҳ монанд.
Раиси вилоят ҳамчунин доир ба маъракаи интихоботи дарпешистода, пеш бурдани корҳои фањмондадиҳӣ, ташкили муташаккилонаи он дастурҳо дод.
Дар машварат масъалаҳои дигари рўзнома низ шунида, муҳокима шуда, доир ба онҳо қарорҳои дахлдор қабул гардиданд.